TOShKENT, 8 dek — Sputnik. O‘zbekistonda metan "zapravkalar" ishlash vaqti soat tonggi 6:00 dan soat 15:00 ga qadar cheklandi. Bu haqida Energetika vazirligi va "Hududgazta’minot" AJ ma’lum qildi.
"Havo haroratining sovib borishi tufayli aholi orasida tabiiy gazga talab oshdi. <...> Qolaversa, 7-16 dekabr kunlari kutilayotgan sovuq ob-havo sharoitida ham gaz bosimining pasayishi kutilyapti. Shundan kelib chiqib, aholini tabiiy gaz bilan uzluksiz ta’minlash maqsadida metan zapravkalari ishlash vaqtini cheklash choralari ko‘rilmoqda. Rejaga muvofiq, metan zapravkalari soat 6:00 dan soat 15:00 ga qadar ishlaydi", - deyiladi xabarda.
Shuningdek, mazkur cheklov vaqtinchalik bo‘lib, aholi iste’molchilari hamda ijtimoiy obyektlarni tabiiy gaz bilan bir maromda ta’minlash maqsadida respublikaning barcha hududida kiritilgani aytib o‘tilgan.
