TOShKENT, 25 noya — Sputnik. Davlat xavfsizlik xizmati Qoraqalpog‘iston, Samarqand va Farg‘onada noqonuniy yer sotayotganlarni qo‘lga tushirdi. Bu haqda O‘zA xabar berdi.
Xabarga ko‘ra, To‘rtko‘l tumanida yashovchi shaxs fuqaroga 30-yil muddatga dehqonchilik qilish maqsadida ajratilgan To‘rtko‘l tumanidagi 1,8 gektar yer maydonini uning nomiga rasmiylashtirib berish evaziga 350 mln. so‘m olgan vaqtida ushlandi.
Samarqand viloyati Oqdaryo tumanida yashovchi fuqaro o‘zi faoliyat yuritib kelayotgan fermer xo‘jaligiga tegishli 20 sotix yer maydonini 40 ming AQSh dollari evaziga sotishga kelishib, mazkur pul mablag‘ini olgan vaqtida ushlandi.
Shuningdek, Farg‘ona tumanida yashovchi fuqaro mazkur tumanda joylashgan, tuman hokimligi zaxirasidagi yer maydonidan 1 gektarini xaridorga 28 ming AQSh dollariga sotishni hamda ushbu yer maydonini mansabdor tanishlari orqali rasmiylashtirib berishni va’da qilgan. Natijada, u mazkur yer maydoni uchun pul mablag‘ini olgan vaqtida ushlandi.