TOShKENT, 2 noya — Sputnik. O‘zbekiston va Turkmaniston o‘rtasida 2023-2024 yillarga mo‘ljallangan “yo‘l xaritasi” imzolandi. Bu haqida O‘zbekiston tashqi ishlar vaziri Baxtiyor Saidov o‘zining Telegram-kanalida ma’lum qildi.
Baxtiyor Saidov Turkmaniston Vazirlar Mahkamasi raisi o‘rinbosari, tashqi ishlar vaziri Rashid Meredov bilan uchrashdi. Unda ikki tomonlama hamkorlik masalalari muhokama etildi.
Baxtiyor Saidov Turkmaniston Vazirlar Mahkamasi raisi o‘rinbosari, tashqi ishlar vaziri Rashid Meredov bilan uchrashdi
“O‘zbekiston-Turkmaniston hamkorligi ko‘plab sohalarda ijobiy sur’at kasb etayotganini qayd etdik, bo‘lajak oliy va yuqori darajadagi kun tartibimizni ko‘rib chiqdik hamda O‘zbekiston va Turkmaniston o‘rtasidagi hamkorlikni yanada rivojlantirish bo‘yicha 2023-2024-yillarga mo‘ljallangan “yo‘l xaritasi”ni imzoladik”, — deb yozadi vazir.
Ma’lumot uchun, tashqi ishlar vaziri Baxtiyor Saidov Ashxobod shahrida bo‘lib o‘tgan Markaziy Osiyo davlatlari tashqi ishlar vazirlari va Yevropada xavfsizlik va hamkorlik tashkiloti (YXHT) bosh kotibi forumida ishtirok etdi.