TOShKENT, 2 noya — Sputnik. Buxoro YuNESKOning nufuzli “Ijodkor shaharlar tarmog‘i” dasturiga qo‘shildi. Bu haqda O‘zbekiston prezidenti yordamchisi Saida Mirziyoyeva ma’lum qildi.
Ta’kidlanishicha, Buxoro YuNESKOning “Ijodkor shaharlari tarmog‘i” dasturiga “Amaliy bezak va xalq san’ati” yo‘nalishi bo‘yicha kiritilgan Markaziy Osiyodagi ilk shahar bo‘ldi. Mazkur dastur dunyoning jami 300 dan ortiq shaharlarini o‘z ichiga qamrab oladi.
“Ushbu ko‘hna shaharning tarixiy va madaniy merosi jahon hamjamiyatining munosib e’tirofiga sazovor bo‘lgani nihoyatda muhim voqeadir”, - deya yozadi Mirziyoyeva.
YuNESKOning "Ijodiy shaharlar tarmog‘i" dasturi 2004-yilda tashkil etilgan va har ikki yilda yangilanadi. U ijodkorlikka barqaror shahar rivojlanishi dvigateli, ijtimoiy integratsiya va madaniyatning dunyoga ta’sirini kengaytirish uchun sarmoya kiritmoqchi bo‘lgan shaharlar o‘rtasida xalqaro hamkorlikni rivojlantirish uchun mo‘ljallangan.
Dastur BMT tashabbuslarini, jumladan, 2030-yilgacha Barqaror rivojlanish maqsadlarini qo‘llab-quvvatlaydi. Hozirda ushbu dasturga dunyoning 300 taga yaqin shaharlari kiritilgan.
Tarmoqqa a’zo bo‘lgan shaharlar ijodkorlik va madaniy sohalarni rivojlantirish, ilg‘or tajribalarni almashish, madaniy ishtirok darajasini oshirish hamda iqtisodiy va ijtimoiy rivojlanish rejalarini ishlab chiqishda madaniyatni hisobga olish uchun hamkorlik qilish va hamkorlikni rivojlantirish majburiyatini zimmasiga oladi.