TOShKENT, 30 okt — Sputnik. Kiyev 90 mingdan ortiq harbiy xizmatchisi, 600 taga yaqin tanki va turli toifadagi 1900 taga yaqin zirhli texnikasini yo‘qotdi. Bu haqida Rossiya mudofaa vaziri Sergey Shoygu ma’lum qildi, deb yozmoqda RIA Novosti.
Rossiya mudofaa vaziri Sergey Shoygu 10-Pekin Sanshan forumida Ukrainadagi maxsus operatsiyada Rossiya qo‘shinlari o‘ziga yuklangan vazifalarni uslubiy tarzda bajarayotganini ma’lum qildi.
“Rossiya Qurolli kuchlari o‘zlariga yuklangan vazifalarni uslubiy va ishonchli bajarishda va tinch aholi xavfsizligini ta’minlashda davom etadi”, — dedi Shoygu.
Vazirning ta’kidlashicha, faqat 4-iyundan boshlab, qarshi hujum paytida Ukraina katta yo‘qotishlarga duch keldi.
“Kiyev 90 mingdan ortiq harbiy xizmatchini, olti yuzga yaqin tankni va turli toifadagi 1900 ga yaqin zirhli texnikasini yo‘qotdi. Shu bilan birga, jang maydonida taktik jihatdan ahamiyatli muvaffaqiyatlarga erishilmadi”, — deb eslatdi Shoygu.
Vazirning so‘zlariga ko‘ra, G‘arb Ukrainadan Rossiyaga “strategik mag‘lubiyat” yetkazish uchun sarflanadigan material sifatida foydalanishga harakat qilmoqda.
“Oq uy Rossiyaning o‘z xavfsizligini ta’minlash bo‘yicha qonuniy huquqlariga e’tibor bermay, o‘zi nazorat qilayotgan NATO blokini sharqda kengaytirishga qat’iy intildi. Bu agressiv qadamlar bizni qarshi choralar ko‘rishga majbur qildi. Bunga javoban G‘arb bizga qarshi boshlangan gibrid urushda Rossiyani “strategik mag‘lubiyatga uchratish” yo‘nalishini ochiqdan-ochiq belgilab oldi”, — deya qo‘shimcha qildi mudofaa vazirligi rahbari.