TOShKENT, 25 okt — Sputnik. O‘zbekiston IT xizmatlari eksport hajmini 500 million dollarga yetkazmoqchi. Bu haqida raqamli texnologiyalar vaziri o‘rinbosari Rustam Karimjonov “ICT Expo Uzbekistan” – axborot-kommunikatsiya texnologiyalari ko‘rgazmasining rasmiy ochilish marosimida ma’lum qildi, deya xabar berdi Sputnik muxbiri.
Raqamli texnologiyalar vaziri o‘rinbosari Rustam Karimjonov
© Ministerstvo sifrovix texnologiy respubliki Uzbekistan
“O‘zbekistonda internetdan foydalanuvchilar soni 31 millionni tashkil qilmoqda. 2040-yilgacha O‘zbekistonda aholi soni 50 millionga yetadi. Bu o‘z o‘zidan internetdan foydalanuvchilar soni o‘sishiga olib keladi”, — dedi Karimjonov.
Uning aytishicha, O‘zbekiston xavfsizlik bo‘yicha dunyoda 9-o‘rin, Toshkent shahri dunyodagi eng arzon poytaxtlar ichida 4-o‘rin, internet narxi arzonligi bo‘yicha esa dunyoda 15-o‘rinni egallaydi.
Ta’kidlanishicha, O‘zbekistonda iqtisodiyot rivojiga o‘z hissasini qo‘sha oladigan 20 million ishchi kuchi bor. Ularning 5 millioni ingliz va boshqa tillarda bemalol gaplasha oladi.
So‘nggi 3-yilda IT yo‘nalishidagi universitetlar va fakultetlar soni 65 taga yetkazildi.
"Bundan 7-yil ilgari IT xizmatlari eksport hajmi 300 million dollar bo‘ladi deganda hech kim, hattoki o‘zimiz ham ishonmaganmiz. Endi bu ko‘rsatkichni 500 million dollarga yetkazmoqchimiz", - deya qo‘shimcha qildi u.