TOShKENT, 19 okt — Sputnik. Eron O‘zbekistonga viza rejimini bekor qilish to‘g‘risida bitim tuzishni taklif qildi. Bu haqda “Teheran Times” xabar bermoqda.
18 oktabr kuni O‘zbekiston ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov Samarqandda Eron turizm vaziri Izzatullo Zarg‘amiy bilan ikki tomonlama hamkorlikni muhokama qilgan. Xususan, Eron vaziri mamlakatlar o‘rtasidagi viza rejimini bekor qilishni taklif qilgan.
“Men Buxoroga borganimda bu ikki xalq naqadar bir-biriga yaqinligini his etdim. Biz o‘zbekistonlik sayyohlarning Eronga kelishini qo‘llab-quvvatlaymiz. Shuningdek, biz xorijga chiqmoqchi bo‘lgan eronlik sayyohlar O‘zbekistonga borishni afzal bilishlari kerak deb hisoblaymiz”, - dedi Zarg‘amiy.
Turizmni rivojlantirishda Turkmaniston bilan ham hamkorlik qilish taklif qilinmoqda.
Eron 60 ta mamlakat fuqarolari uchun viza rejimini osonlashtirish imkoniyatini ko‘rib chiqmoqda.
Eslatib o‘tamiz, 2022-yil sentabrida O‘zbekiston va Eron turistik guruhlar, ishbilarmon va ilmiy doiralar vakillari uchun viza berishning soddalashtirilgan tartibini joriy qilgan edi.