TOShKENT, 5 okt — Sputnik. Xanchjou-2022 Osiyo o‘yinlarida o‘zbekistonlik sportchilar muvaffaqiyatli ishtirok etishmoqda, deya xabar berdi Milliy olimpiya qo‘mitasi.
Bugundan slalomda eshkak eshish bo‘yicha bellashuvlar boshlandi. Erkaklar o‘rtasida kanoe slalomida kechgan birinchi saralash bahsida Anvar Klevlev (92.44 soniya) eng yaxshi natija bilan keyingi bosqichga yo‘l oldi. Alibek Temirgaliyev esa kechki dasturda bo‘lib o‘tadigan keyingi startda yana bir bor o‘z omadini sinab ko‘radi.
Konkur bo‘yicha O‘zbekiston terma jamoasi a’zolari saralashdagi ishtirokini yakunlashdi. Ular yakkalik va jamoaviy dasturda bahs olib borishdi. Unda Bahromjon Gaziyev (“Ledi” laqabli otda), Bekzod Qurbonov (“Santos Hippica”), Xurshid Alimjonov (“Chempions liga”) va Umidjon Komilov (“Kalleko”) mamlakat sharafini himoya qilishdi.
O‘zbekiston yilqichilik va ot sporti federatsiyasining ma’lum qilishicha, saralash bahslarida 17 mamlakatdan 56 nafar chavandoz ishtirok etib, 40 nafar sportchi yarim finalga yo‘l olgan. Ular orasida B.Gaziyev, B.Qurbonov hamda X.Alimjonovning nomlarini uchratish mumkin. Bugun ularning otlari sanitar tekshiruvdan o‘tadi. Ertaga esa medallar uchun yakuniy bellashuvlar bo‘lib o‘tadi.
Bugun Xanchjou-2022 XIX yozgi Osiyo o‘yinlarida boks bo‘yicha erkaklar o‘rtasida final bahslari bo‘lib o‘tadi. Shuningdek, karate WKF, slalomda eshkak eshish, jiu-jitsu kabi sport turlarida atletlar bahslarga kirishadi.