TOShKENT, 4 okt – Sputnik. Rossiyaning "Lukoyl" kompaniyasi O‘zbekistonda malakali kadrlarni ishga oladi.
Ushbu masala O‘zbekiston bandlik va kambag‘allikni qisqartirish vaziri Behzod Musayevning "Lukoyl" kompaniyasi rahbariyati bilan uchrashuvida muhokama qilindi, deb xabar bermoqda vazirlik matbuot xizmati.
"O‘zaro muzokaralarda neft-gaz sohasida malakali mutaxassislarni tayyorlash va ularni Rossiyaning “Lukoyl” kompaniyasida smenali ish bilan ta’minlash masalalari muhokama qilindi", - deyiladi xabarda.
Uchrashuvda vazir Behzod Musayev kompaniyada ishlash istagini bildirgan fuqarolarning haq-huquqlarini himoya qilish hamda ularni munosib mehnat sharoiti bilan ta’minlash ikki tomonlama kelishuvda bosh mezon bo‘lishini ta’kidladi.
Rossiya kompaniyasi tomonidan uchrashuvda “Lukoyl” kompaniyasi vitse-prezidentlari Stepan Gurjiy va Anatoliy Moskalenko hamda “Lukoyl Uzbekistan Opereyting Kompani” mas’uliyati cheklangan jamiyati bosh direktori Timur Gaynanshinlar ishtirok etishdi.