Mirziyoyev Nyu-Yorkda Xalqaro valyuta fondi direktorini qabul qildi

Uchrashuvda Xalqaro valyuta fondi boshqaruvchi direktori O‘zbekiston bilan yaqindan hamkorlik qilishga tayyorligini bildirdi.
Sputnik
TOShKENT, 19 sen — Sputnik. O‘zbekiston prezidenti Shavkat Mirziyoyev Nyu-York shahrida Xalqaro valyuta fondi (XVF) boshqaruvchi direktori Kristalina Georgiyevani qabul qildi, deya xabar berdi davlat rahbari matbuot xizmati.
Qayd etilishicha, uchrashuvda fond rahbari O‘zbekistonda ortga qaytmas tus olgan islohotlar dasturi natijalariga yuqori baho berdi. Mamlakatdagi samarali yangilanishlarni ilgari surishda yaqindan hamkorlik qilishga tayyorligini bildirdi.
"Uchrashuvda XVFning O‘zbekiston moliya sohasi barqarorligini kompleks tahlil qilish, iqtisodiy siyosatni takomillashtirish bo‘yicha takliflar ishlab chiqishda konsalting ko‘magini ko‘rsatish hamda mamlakat idoralari mutaxassislarining salohiyatini oshirish dasturini amalga oshirishdagi ishtirokiga doir masalalar muhokama qilindi", - deyiladi xabarda.
Shuningdek, uchrashuvda XVF bilan o‘zaro manfaatli hamkorlik, shu jumladan shu yil iyun oyida Samarqandda o‘tgan ikki tomonlama uchrashuvda erishilgan kelishuvlardan kelib chiqqan holda yanada kengaytirish masalalari ko‘rib chiqildi.