TOShKENT, 8 sen — Sputnik. O‘zbekistonda joylarda sanoat korxonalarini oldindan xabardor qilmasdan elektr ta’minotidan uzish amaliyotiga qat’iy chek qo‘yiladi. Prezident Shavkat Mirziyoyev Energetika vazirligiga tegishli topshiriqni berdi.
Davlat rahbari raisligidagi yig‘ilishda hududlardagi sanoat korxonalari, avvalo, energiya resurslari ta’minoti bilan bog‘liq masalalarga alohida e’tibor qaratish muhimligi aytib o‘tildi.
Shu munosabat bilan bosh vazir boshchiligidagi komissiyaga bir oy davomida barcha hududlarga borib:
- qo‘shimcha ishlab chiqarishni hisobga olgan holda, oyma-oy hududlarning energiya balansini ishlab chiqish;
- joriy yilda ishga tushadigan loyihalarni birma-bir xatlovdan o‘tkazib, ularga zarur energiya resurslari ajratishni nazarda tutish topshirildi.
"Energetika vazirligiga joylarda sanoat korxonalarini oldindan xabardor qilmasdan elektr ta’minotidan uzish amaliyotiga qat’iy chek qo‘yishga topshiriq berildi", - deyilgan prezident matbuot xizmati xabarida.