TOShKENT, 16 avg — Sputnik. Markaziy Osiyo davlatlari rahbarlari 14-15 sentabr kunlari Dushanbeda uchrashadi, dedi Tojikiston tashqi ishlar vaziri Sirojiddin Muhriddin.
Vazirning so‘zlariga ko‘ra, oliy darajadagi beshinchi maslahat yig‘ilishi Tojikiston prezidenti Emomali Rahmon raisligida o‘tadi.
"Ushbu uchrashuvni yuksak saviyada va munosib o‘tkazish uchun Markaziy Osiyo davlatlari bilan doimiy hamkorlikda bo‘lib, har tomonlama tayyorgarlik ishlari olib borilmoqda", – dedi Sirojiddin Muhriddin.
Vazir Markaziy Osiyo davlatlari rahbarlarining maslahat uchrashuvida hujjatlar to‘plami imzolanishini, ulardan eng muhimi davlat rahbarlarining yakuniy deklaratsiyasi bo‘lishini aytdi.
Shuningdek, Dushanbeda ikkita muhim shartnoma – quruqlikdagi transport va yoshlar siyosati sohasida imzolanadi.
"Tojikiston, shuningdek, Markaziy Osiyo davlatlari rahbarlarining beshinchi maslahat uchrashuvi doirasida 12 ta qo‘shimcha tadbir o‘tkazishni taklif qildi. Ular orasida iqtisodiy forum, olimlar forumi, faol ayollar uchrashuvi, madaniy dastur va mintaqaning beshta davlati milliy taomlari ko‘rgazmasi ham bor”, - dedi TIV rahbari.
Shu bilan birga, Dushanbe shahrida Orolni qutqarish xalqaro jamg‘armasi Davlat rahbarlari kengashining navbatdagi majlisi rejalashtirilgan bo‘lib, uning yakunlari bo‘yicha bir qancha qarorlar imzolanishi kerak.
Markaziy Osiyo davlatlari rahbarlarining to‘rtinchi uchrashuvi o‘tgan yili 2-iyun kuni Qirg‘izistonda bo‘lib o‘tgan edi. Markaziy Osiyo rahbarlari beshlik formatida uchrashuvlar o‘tkazishi 2018-yilda Ostonada boshlangan edi.