TOShKENT, 10 avg — Sputnik. AQSh prezidenti Jo Bayden Kongressdan Ukrainaga 10 milliard dollar qo‘shimcha yordam so‘ramoqchi, xabar berdi vaziyatdan xabardor Vashingtondagi manba RIA Novostiga.
“Qo‘shimcha mablag‘ o‘n milliarddan oshishi kutilmoqda”, — dedi manba.
Uning so‘zlariga ko‘ra, Amerika rahbari bu so‘rovni 10-avgust kuni qilishni rejalashtirgan.
Chorshanba kuni Oq uy Milliy xavfsizlik kengashi matbuot kotibi Baydenning qonun chiqaruvchi organga ehtimoliy yangi murojaati haqida AQSh rasmiylari hali hech narsa e’lon qilmaganligini aytdi.
Amerikaning yetakchi OAVlari avvalroq yozganidek, Kongress allaqachon Oq uy ma’muriyatiga Kiyev rejimiga turli xil yordam ko‘rsatish uchun 43 milliard dollar ajratgan.
Shu bilan birga, iyul oyi oxirida Vladimir Zelenskiy Ukrainada G‘arb davlatlari uni qo‘llab-quvvatlash uchun ajratadigan mablag‘ yetarli emasligini aytdi. Shu bilan birga, Oliy Rada joriy yilda mamlakat budjetiga tushgan barcha daromadlarning deyarli yarmini chet el yordamlari tashkil etganini ma’lum qildi. Gap 25,3 milliard dollar haqida ketmoqda.
Aniqlik kiritilishicha, YeI makromoliyaviy yordam mexanizmi doirasida 11,43 milliard dollarlik imtiyozli kreditlar ajratgan eng yirik donor bo‘lib qolmoqda. Yana 3,59 milliard dollar Xalqaro valyuta jamg‘armasidan, 1,76 milliard dollar esa Kanadadan kelgan.