TOShKENT, 8 avg — Sputnik. Toshkent shahri Mirobod tumanida 17 yoshli qizning orqasidan kelib, unga tashlangan erkakka nisbatan 10-yil muddatga ozodlikdan mahrum qilish jazosi tayinlandi. Bu haqda Oliy sud matbuot kotibi xabar berdi.
8 avgust kuni jinoyat ishlari bo‘yicha Mirobod tuman sudida O.O. (1997 yilda Samarqand viloyatida tug‘ilgan, ishsiz, muqaddam sudlanmagan)ga oid jinoyat ishini ko‘rib chiqish bo‘yicha sud jarayoni yakunlangan.
Sud hukmiga muvofiq O.O. Jinoyat kodeksining 25,118-moddasi (Nomusga tegishga suiqasd qilish) 3-qismi "a" bandida nazarda tutilgan jinoyatni sodir etganlikda aybli deb topilgan. Unga 10-yil muddatga ozodlikdan mahrum qilish jazosi tayinlangan. Mahkum jazoni umumiy tartibli koloniyada o‘taydi.
Eslatib o‘tamiz, bu erkak 19-aprel kuni 2005-yilda tug‘ilgan Z.B.ning orqasidan kelib, quchoqlagan, unga nisbatan nomaqbul harakat qilgan edi. Keyin esa voqea joyidan qochib ketgan edi.