TOShKENT, 22-iyul — Sputnik. Yadro fizikasi instituti hududida yong‘in sodir bo‘ldi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Toshkent shahri Mirzo Ulug‘bek tumanidagi "Ulug‘bek" shaharchasida yong‘in sodir bo‘ldi.
Aytilishicha, Fanlar akademiyasi qoshidagi Yadro fizikasi institutiga tegishli yashil belbog‘ hududida 6 gektarga yaqin maydon yonib ketgan.
Ayni damda Ekologiya vazirligi tomonidan tezkor ishchi guruh tuzilib, voqea joyida o‘rganish ishlari olib borilmoqda. Yong‘in sababi, oqibatlari va boshqa tafsilotlar aniqlanmoqda.
Xabarda qayd etilishicha, o‘rganish natijalariga ko‘ra batafsil ma’lumot beriladi.