TOShKENT, 22-iyul — Sputnik. Buyuk Britaniya, Fransiya va Italiya 2030-yilga borib iqtisodlari yetakchi o‘ntalikni tark etadi. Bu haqda Vengriya bosh vaziri Viktor Orban ma’lum qildi, deb yozmoqda RIA Novosti.
Vengriya bosh vaziri Viktor Orban M1 telekanalida o‘n yillikla oxriga kelib Buyuk Britaniya, Italiya va Fransiya dunyoning yetakchi o‘nta iqtisodiyotidan chiqishi, Germaniya esa to‘rtinchi o‘rindan o‘ninchiga tushib qolishini aytdi.
“Xalqaro valyuta jamg‘armasining mamlakatlar yalpi ichki mahsuloti hajmi bo‘yicha tuzilgan ro‘yxatiga nazar tashlaydigan bo‘lsak, 2030-yilga borib Buyuk Britaniya, Italiya va Fransiya ushbu reytingning kuchli o‘ntaligidan tushib qolishini, to‘rtinchi o‘rinni egallagan Germaniya esa o‘ninchi o‘ringa siljishini ko‘ramiz. Bu haqiqat”, - deydi u.
Uning so‘zlariga ko‘ra, Yevropa Ittifoqi hozirda o‘zini “o‘rab olingan va qo‘rqib ketgandek” his qilmoqda.
“Hafta boshida Yevropa Ittifoqi-Lotin Amerikasi sammiti bo‘lib o‘tdi, u yerda Lotin Amerikasi yetakchilarining lug‘atidagi eng ko‘p uchraydigan iboralar “mahalliy genotsid”, “qullik” va “reparativ adolat” ekanligini o‘z ko‘zim bilan ko‘rdim va o‘z qulog‘im bilan eshitdim. Yevropa Ittifoqi o‘zini qurshab olgandek xis qilayotgani ajablanarli emas”, dedi Orban.
Uning ta’kidlashicha, Yevropa Ittifoqi raqobatdan qo‘rqadigan “zaif va boy ittifoq” bo‘lib, “chempionlik kamarlari bilan maqtanadigan, lekin endi ringga chiqishni istamaydigan keksa boks chempioniga o‘xshaydi”. "Bu izolyatsiyaga, iqtisodiy, siyosiy va madaniy gettolarga olib keladi", deb qo‘shimcha qildi Orban.