TOShKENT, 12-iyul — Sputnik. O‘zbekistonga Rossiyadan muzqaymoq importi yana oshirildi, deya xabar berdi Statistika agentligi.
Qayd etilishicha, shu yilning yanvar-may oylarida O‘zbekiston 8 ta xorijiy davlatdan qiymati 3,5 mln dollarga teng bo‘lgan muzqaymoq va muzqaymoq mahsulotlarini import qilgan.
Muzqaymoq va muzqaymoq mahsulotlari importi o‘tgan yilning mos davri bilan solishtirilganda 158 tonnaga oshgan.
O‘zbekistonga 5 oyda import qilingan muzqaymoq va muzqaymoq mahsulotlarinining eng katta ulushiga Rossiyaga (458 tonna) to‘g‘ri kelmoqda.
Shuningdek, Qozog‘istondan 164 tonna, Belarusdan 36 tonna, Qirg‘izistondan 33 tonna, Estoniyadan 27 tonna, Litvadan 8,6 tonna va Fransiyadan 7,4 tonna muzqaymoq va muzqaymoq mahsulotlari import qilingan.
Ma’lumot uchun, muzqaymoq ichidagi muz parchalari (kristallari) shirinlik qayta muzlatilganidan dalolat beradi – ehtimol, mahsulot yaroqsiz bo‘lib qolgan. Muzqaymoq nomi uning yog‘lik darajasini bildirishi kerak. Sutli muzqaymoqda uning darajasi 7,5 foizdan ko‘p emas, qaymoqli shirinlikda 8 foizdan 11,5 foizgacha, plombirda esa 20 foiz bo‘lishi mumkin.
Eslatib o‘tamiz, 2023-yilning 4 oyida O‘zbekistonga eng ko‘p Rossiyadan (330 tonna) muzqaymoq va muzqaymoq mahsulotlari import qilingan.