TOShKENT, 8-iyul — Sputnik. O‘zbekistonda Saylovchilar yagona elektron ro‘yxatiga (SAER) jami 19 mln 593 ming 838 nafar fuqaro kiritildi. Bu haqda Markaziy saylov komissiyasi raisi Zayniddin Nizamxodjayev ma’lum qildi.
Qayd etilishicha, xorijiy mamlakatlarda tuzilgan saylov uchastkalaridagi saylovchilar ro‘yxatiga jami 323 ming 626 nafar saylovchi kiritildi.
"Prezidentlikka nomzodlarning saylovoldi tashviqoti 7-iyundan 7-iyulga qadar davom etdi. Prezidentlikka nomzodlarning tarjimai holi hamda saylovoldi dasturining qisqacha mazmuni aks etgan axborot plakatlari 691 314 nusxa joylashtirildi. Saylovga chorlash maqsadida joylashtirilgan plakatlar soni 388 578 tani tashkil etdi", dedi u.
Eslatib o‘tamiz, O‘zbekistonda prezident saylovi 9-iyul kuniga belgilangan. O‘zbekiston prezidenti saylovida respublika bo‘yicha jami 14 ta saylov okrugi tashkil etilib, ularga 10784 ta saylov uchastkalari biriktirilgan. O‘zbekiston bo‘ylab saylov uchastkalari soat 8.00 dan 20.00 gacha ochiq bo‘ladi.
Prezidentlikka Ekopartiyadan Abdushukur Hamzayev, Xalq-demokratik partiyasidan Ulug‘bek Inoyatov, "Adolat" sotsial-demorkatik partiyasidan Robaxon Mahmudova, O‘zbekiston Liberal-demokratik partiyasidan (O‘zLiDeP) amaldagi davlat rahbari Shavkat Mirziyoyev nomzodi ilgari surilgan.