TOShKENT, 7-iyul — Sputnik. MDH Parlamentlararo assambleyasi (MDH PA) kuzatuvchilari Markaziy saylov komissiyasi (MSK) rahbariyati bilan uchrashuv o‘tkazdi, deya xabar berdi Sputnik muxbiri.
MDH PA xalqaro kuzatuvchilar guruhi muddatidan ilgari prezidentlik saylovlarini kuzatish uchun O‘zbekistonga keldi.
MDH Parlamentlararo assambleyasi kuzatuvchilari O‘zbekiston MSK rahbariyati bilan uchrashdi
© Sputnik/Ramiz Baxtiyarov
Guruhning muvofiqlashtiruvchisi Qozog‘iston parlamenti Senati raisining o‘rinbosari Jakip Asanov hisoblanadi. Monitoring guruhi tarkibiga 54 nafar kuzatuvchi, jumladan senatorlar, deputatlar va ekspertlar kiradi. Ular orasida Ozarbayjon, Armaniston, Belarus, Qozog‘iston, Qirg‘iziston, Rossiya va Tojikiston parlamentlari vakillari bor.
Ular 9-iyul kuni Toshkent shahri va O‘zbekistonning boshqa viloyatlaridagi saylov uchastkalariga tashrif buyurishadi.
“Bugun va ertaga o‘z nomzodini ko‘rsatgan barcha siyosiy partiyalar bilan uchrashamiz. Biz juda xolis kuzatuvga umid qilamiz”, — dedi MDH PA Kengashi Bosh kotibi Dmitriy Kobiskiy O‘zbekiston MSK rahbari bilan uchrashuvda.
Eslatib o‘tamiz, O‘zbekistonda prezident saylovi 9-iyul kuniga belgilangan.
O‘zbekiston prezidenti saylovida respublika bo‘yicha jami 14 ta saylov okrugi tashkil etilib, ularga 10784 ta saylov uchastkalari biriktirilgan.
O‘zbekiston prezidenti saylovini kuzatish uchun chet el davlatlari va nufuzli xalqaro tashkilotlardan 785 nafar kuzatuvchilar tashrif buyuradi. Undan tashqari saylovni yoritish uchun akkreditatsiyadan o‘tgan mahalliy va xorijiy jurnalistlar va OAV vakillari umumiy soni 1 299 nafarni tashkil etmoqda.