TOShKENT, 19-iyun – Sputnik. “CAFA Nation’s Cup” xalqaro musobaqasi doirasida O‘zbekiston va Eron terma jamoalari o‘rtasidagi final uchrashuvni Kirill Levnikov boshchiligidagi rossiyalik hakamlar guruhi boshqarib boradi. Bu haqda RIA Novosti xabar berdi.
Jamoalar o‘rtasidagi o‘yin 20-iyun kuni Toshkentda bo‘lib o‘tadi. Levnikov jamoasining CAFA turnirida faoliyat yuritishi esa may oyida ma’lum bo‘lgan edi.
“Ertaga Toshkentda bo‘lib o‘tadigan O‘zbekiston – Eron uchrashuviga rossiyalik hakamlar jamoasi tayinlandi”, — deyiladi CAFA matbuot xizmati xabarida.
O‘zbekiston final yo‘lida O‘mon (3:0), Turkmaniston (2:0) va Tojikiston (5:1) jamoalari ustidan g‘alaba qozondi. Eron esa Qirg‘iziston va Afg‘oniston vakillarini ortda qoldirdi.
Final 20-iyun kuni soat 20:30 da "Bunyodkor" stadionida boshlanadi.
Futbol bo‘yicha “CAFA Nation’s Cup” xalqaro turniri shu yilning 10-20 iyun kunlari bo‘lib o‘tmoqda. Turnirda Markaziy Osiyo mamlakatlari: O‘zbekiston, Tojikiston, Turkmaniston, Qirg‘iziston, shuningdek, O‘mon, Eron hamda Afg‘oniston mamlakatlari terma jamoalari ishtirok etmoqda.