Maktab bitiruvchilariga shahodatnomalar qayerda beriladi?

TOShKENT, 16-iyun — Sputnik. Shu yildan maktab bitiruvchilariga shahodatnomalar elektron beriladi, deya xabar berdi Ta’lim nazorati.

Qayd etilishicha, 9- va 11-sinfni bitirayotgan o‘quvchilarga shahodatnomalar qog‘oz shaklda emas, elektron shaklda beriladi.

Bunda bitiruvchilar haqidagi ma’lumotlar “Elektron shahodatnoma” axborot tizimiga kiritiladi va ushbu ma’lumotlar ta’lim tashkiloti direktori tomonidan elektron platforma orqali tasdiqlanadi.

Shahodatnomalarni bitiruvchilarga har yili 20-iyunga qadar beriladi. Bitiruvchi “Elektron shahodatnoma” platformasiga ID-karta, pasport yoki tug‘ilganlik to‘g‘risidagi guvohnoma seriyasi va raqamini kiritib shahodatnomasini bepul yuklab oladi.

Saytda shahodatnoma olish tugmasini bosgandan so‘ng, shaxsiy raqam va tug‘ilgan sana yoki pasport va tug‘ilgan sana bilan qidiruvni amalga oshirish mumkin. Tegishli ma’lumotlar kiritilgandan so‘ng, rasmdagi himoya kodini kiritish kerak bo‘ladi.

Bitiruvchi haqidagi ma’lumotlar ta’lim tashkiloti direktori tomonidan elektron platforma orqali tasdiqlangandan so‘ng shahodatnoma avtomatik tarzda shakllantiriladi va unga QR-kod tasviri tushiriladi.

Internet yetib bormagan olis va chekka hududlarda joylashgan ta’lim tashkilotlariga shahodatnomalar elektron platformadan yuklab olinib, chop etilgan holda taqdim etiladi.