TOShKENT, 14-iyun — Sputnik. Toshkent shahrida jamoat transporti xizmatidan foydalanuvchilar soni oshmoqda, deya xabar berdi Transport vazirligi.
Qayd etilishicha, yo‘lovchi tashuvlar o‘tgan yilning shu davriga nisbatan 63 foizga oshgan.
Yo‘lovchilar soni quyidagi sabablar asosida oshmoqda:
“Toshshahartransxizmat” AJ harakat tarkibining yangilanishi;
yo‘nalishlarga yangi katta va o‘ta katta sig‘imli avtobus va elektrobuslarning chiqarilishi.
Yo‘lovchi tashuvlari shu yil may oyida kunlik 782 ming nafar yo‘lovchini tashkil etdi. O‘tgan yilning shu davrida ushbu ko‘rsatkich 478 ming nafarni tashkil etgan.
Joriy yil may oyida kunlik 1330 ta avtobus yo‘nalishga chiqarilgan bo‘lsa, 2022-yilning shu davrida kunlik avtobuslar soni 806 tani tashkil etgan (+40%).
May oyida amalga oshirilgan kunlik qatnovlar soni 16 741tani tashkil etgan. O‘tgan yilda ushbu ko‘rsatkich 10 424 taga teng bo‘lgan (+60% gacha oshgan).
Eslatib o‘tamiz, 20-apreldan Xitoydan olib kelingan avtobuslar Toshkent ko‘chalarida harakatlana boshladi. Shu kuni 400 ta avtobus va elektrobuslar, jumladan, o‘ta katta sig‘imli 114 ta 18 metrlik avtobuslar, 169 ta "Yutong" elektrobuslari hamda 117 ta gazda yuradigan katta sig‘imli "Yutong" avtobuslari yo‘nalishlarga chiqarildi.