TOShKENT, 3-iyun — Sputnik. Ukrainada tinchlik o‘rnatilishi G‘arb Rossiya bilan muzokara qilish zarurligini tushunsagina mumkin bo‘ladi. Bu haqda Qrim parlamenti rahbari Vladimir Konstantinov RIA Novostiga ma’lum qildi.
Avvalroq Vladimir Zelenskiy Ukrainadagi mojaroni hal qilish uchun asos faqat Ukrainaning hududiy yaxlitligini tiklash va mamlakatning harbiy harakatlardan ko‘rgan yo‘qotishlarini Rossiya aktivlari hisobidan qoplashning xalqaro mexanizmini yaratishni o‘z ichiga olgan Ukrainaning “tinchlik formulasi” bo‘lishi mumkinligini aytgan.
“G‘arb Rossiya bilan muzokaralar olib borish zarurligini tushunsagina tinchlik bo‘lishi mumkin, biroq ular hozircha bunday xulosaga kelmagan. Zelenskiyga kelsak, bu vaqtinchalik shaxs, uning siyosiy kunlari, menimcha, sanoqli. Va unga hech qanday formulalar yordam bermaydi ”, dedi Konstantinov.
Uning so‘zlariga ko‘ra, Zelenskiy uchun tinchlikning har qanday boshqa, haqiqiy formulasini tan olish siyosiy o‘lim bilan barobar.
“Shuning uchun, u boshqa hech narsa deya olmaydi. U allaqachon qancha ukrainalikni o‘ldirgan, iqtisodiyotni qanday vayron qilgan, mamlakatni vayron qilgan - bularning barchasi uchun u xalq oldida javob berishi va Minsk kelishuvlariga nima uchun amal qilmaganini tushuntirishi kerak. Va bu lahzani kechiktirish uchun u tinchlik uchun eng real bo‘lmagan, amalga oshirib bo‘lmaydigan formulalarni o‘ylab topadi", deb ta’kidladi Konstantinov.
Uning fikricha, siyosiy voqelik o‘zgardi va kelajak dunyo uchun shart-sharoit Zelenskiysiz shakllanadi.