TOShKENT, 28-may — Sputnik. O‘zbekiston bosh konsuli Fariddin Nasriyev joriy yilning 25-may kuni Qozon shahridagi Xalqaro munosabatlar institutida o‘tkazilgan “Rossiya – Markaziy Osiyo” yoshlar xalqaro forumida ishtirok etdi. Bu haqda “Dunyo” AA xabar berdi.
Tadbirda Qozon federal universiteti prorektori Timirxan Alishev, Moskva Davlat Xalqaro munosabatlar instituti dotsenti Dmitriy Yevstavyev, Tatariston Respublikasi Ta’lim va fan vazirining birinchi o‘rinbosari Andrey Pominov, Tatariston Respublikasi Yosh diplomatlar akademiyasi raisi Dilbar Sodiqova va boshqalar qatnashdi.
O‘zbekiston bosh konsuli o‘z nutqida Markaziy Osiyo va Rossiya davlatlari xalqlari o‘rtasida tarixiy va do‘stlik asosida asrlik munosabatlar bugungi yoshlarning har tomonlama kamol topishiga mustahkam poydevor ekanligini ta’kidladi.
Bundan tashqari, bugungi kunda Tatariston oliy o‘quv yurtlarida 3 mingdan ortiq o‘zbekistonlik talabalar tahsil olayotgani, ular nafaqat bilim olishlari, balki yashashi, sport bilan muntazam shug‘ullanishi hamda o‘z ustida ishlashlari uchun barcha sharoitlar yaratib berilgani ta’kidlandi.
Fariddin Nasriyev so‘zining yakunida “Rossiya – Markaziy Osiyo” yoshlar xalqaro forumi ishtirokchilariga muvaffaqiyat tiladi.