TOShKENT, 25-may – Sputnik. Butunrossiya davlat kinematografiya instituti (VGIK)ning Toshkent filialida rossiyalik taniqli kinoproduser, aktor va rejissor Janik Fayziyev hamda VGIK pedagogi Anton Malishevning mahorat darslari o‘tkazildi. Bu haqda Sputnik muxbiri xabar berdi.
“Kino san’ati va sanoatini birlashtirish, bu sohada mablag‘ topish uchun mahorat va iste’dod bilan birgalikda, ijodkorda intiluvchanlik va zamonaviylik bo‘lishi kerak. Ayniqsa, texnologiyalar rivojlangan zamonaviy dunyoda moliyaviy savodxonlik muhim o‘rin tutadi”, - dedi kinoproduser Janik Fayziyev.
Talabalarga kinofilmni taqdimot loyihasini ishlash, produserlik va rejissorlik uslublari haqida tushuntirildi.
© Sputnik/Dostonbek Raxmatullayev
“Kinoasarlarni moliyalashtirish, davlat granti hamda xususiy sektorlardagi investorlar bilan ishlash katta farq qiladi. Men avval davlat fondida ishlardim, katta filmlarga grantlar ajratiladi. Hozir esa xususiy fondda faoliyat olib borapman va bu yo‘nalishdagi kinoloyihalar bilan ishlayapman. Ijodkor bu ikki strukturani yaxshilab o‘rganib olishi lozim”, - dedi pedagog Anton Malishev.
Mahorat darsida talabalarga grant loyihalar sxemasini yaratish, striming va kinodistribyutor vazifalari, moliyaviy smetalash va zamonaviy xorijiy kinobozorlar haqida ma’lumotlar berildi.
© Sputnik/Dostonbek Raxmatullayev
Shuningdek, kino ta’limni rivojlantirish, san’at pedagogikasi, suratga olish maydonchalarida ishlash, kinodramaturgiya bo‘yicha adabiyotlar tanishtirildi.
Avvalroq, Butunrossiya davlat kinematografiya instituti (VGIK)ning Toshkent shahar filialida Rossiya xalq artisti Vladimir Xotinenko hamda kinoshunos Tatyana Yakovleva tomonidan mahorat darsi bo‘lib o‘tgan edi.