TOShKENT, 24-may — Sputnik. O‘zbekiston-Singapur sammiti yakunida “Ko‘ksaroy” qarorgohida daraxt ekish marosimi bo‘lib o‘tdi. Bu haqda prezident matbuot xizmati xabar berdi.
Prezidentlar Shavkat Mirziyoyev va Halima Yaqub Faxriy mehmonlar xiyobonida archa ekdi.
“Bu davlatlararo munosabatlarda yangi davr boshlangani, O‘zbekiston va Singapur xalqlari do‘stligi mustahkamlanib borayotganining ramzi bo‘ldi”, - deyiladi xabarda.
Eslatib o‘tamiz, O‘zbekiston prezidenti Shavkat Mirziyoyev va Singapur prezidenti Halima Yaqub huzurida ikki tomonlama hujjatlarni almashish marosimi bo‘lib o‘tdi. O‘zbekiston va Singapur o‘rtasida 7 ta hujjat imzolandi.