TOShKENT, 24-may — Sputnik. Ko‘ksaroy qarorgohida O‘zbekistonga davlat tashrifi bilan kelgan Singapur prezidenti Halima Yaqubni rasmiy kutib olish marosimi bo‘lib o‘tdi.
Qarorgoh oldidagi maydonda faxriy qorovul saf tortdi.
Prezident Shavkat Mirziyoyev oliy martabali mehmonni samimiy qarshi olib, shohsupaga taklif qildi.
Harbiy orkestr ikki davlat madhiyalarini ijro etdi.
Prezidentlar faxriy qorovul safi oldidan o‘tib, rasmiy delegatsiyalar a’zolarini qutladilar.
Birgalikda suratga tushishdan so‘ng oliy darajadagi muzokaralar boshlandi.
Halima Yaqub O‘zbekiston yetakchisining taklifiga binoan davlat tashrifi bilan mamlakatda bo‘lib turibdi. Singapur rahbarining tashrifi dasturida oliy darajadagi muzokaralar o‘tkazilishi ko‘zda tutilgan.
Sammit kun tartibidan konstruktiv siyosiy muloqotni yanada rivojlantirish, mintaqaviy va xalqaro tashkilotlar doirasida o‘zaro qo‘llab-quvvatlash, ikki mamlakat yetakchi kompaniya va bank institutlari ishtirokidagi investitsiya loyihalariga ko‘maklashish, madaniy-gumanitar almashinuvni kengaytirish masalalari o‘rin olgan. Bundan tashqari, Singapur prezidenti Samarqand shahriga tashrif buyurib, Buyuk Ipak yo‘li chorrahasida joylashgan ushbu ko‘hna markazning boy madaniy-tarixiy va sivilizatsiyaviy merosi bilan tanishadi.