TOShKENT, 14-may — Sputnik. Turkiyaning amaldagi prezidenti, prezidentlik saylovlarida nomzodlardan biri Rajab Toyib Erdog‘an Istanbuldagi saylov uchastkalaridan birida ovoz berdi. Bu haqda RIA Novosti muxbiri xabar berdi.
Erdog‘an uchastkaga rafiqasi hamrohligida mahalliy vaqt bilan soat 11:40 atrofida yetib keldi.
Bungacha uchastkada jiddiy xavfsizlik choralari ko‘rilgan: yaqin atrofdagi uylar ko‘zdan kechirilgan, fuqarolar va Erdog‘anni himoya qilish uchun ko‘plab harbiy xizmatchilar va bir nechta harbiy avtomobillar yetib kelgan.
Turkiya prezidentining ovoz berish jarayonida saylovchilar saylov uchastkasiga kiritilmadi – biroq ular bundan g‘azablanmadi, aksincha, hatto prezidentni ko‘rish uchun saf tortdi va uni olqishlar bilan kutib oldi.
Turkiyada 14-may kuni prezidentlik va parlament saylovlari bo‘lib o‘tmoqda. Erdog‘anning asosiy raqibi – oltita muxolifat partiyasidan yagona nomzod Kemal Qilichdoro‘g‘li (“Respublika xalq partiyasi”). Saylovda “Ata” alyansidan nomzod Sinan O‘g‘an ham ishtirok etmoqda. To‘rtinchi nomzod, “Memleket” partiyasi yetakchisi Muharrem Inje saylovga uch kun qolganda nomzodlikdan voz kechganini ma’lum qildi. Agar hech bir nomzod 50 foiz ovoz ololmasa, prezidentlik saylovining ikkinchi bosqichi 28-mayga belgilangan.