TOShKENT, 11-may — Sputnik. Sharg‘un ko‘mir konining birinchi liniyasi ishga tushiriladi. Bu haqda prezident Shavkat Mirziyoyev ishtirokida o‘tayotgan yig‘ilishda ma’lum qilindi.
Davlat rahbari hududlarda energiyani tejash masalasiga to‘xtalib o‘tdi.
Qayd etilishicha, Qarshi tumanidagi tadbirkor 10 gektar issiqxonani ko‘mirda isitish loyihasini boshlagan. Loyiha doirasida ko‘mirni sintez qilish orqali yiliga 2,8 million kub metr gaz iqtisod qilinib, 8 million kilovatt soat elektr energiyasi ishlab chiqariladi.
Qolgan viloyatlarda ham shunday loyihalarni amalga oshirish bo‘yicha dasturlar qabul qilish zarurligi ta’kidlandi.
Aytilishicha, ko‘mirga talab shu yilning o‘zida 1,5 baravarga oshishi kutilmoqda. Shuni hisobga olib, shu yilda ko‘mir qazib chiqarishni 5,3 million tonnadan 6,5 million tonnaga olib chiqish zarurligi qayd etildi.
Buning uchun “Angren” ko‘mir koniga 80 million dollar kredit ajratiladi. “Sharg‘un ko‘mir”ning birinchi liniyasi ishga tushiriladi. Shuningdek, 14 ta ko‘mir koniga tadbirkorlar jalb qilinadi.