TOShKENT, 4-may — Sputnik. Buxoro shahar 3-sonli issiqlik ta’minoti qozonxonasida va Muborak IEM korxonasida energosamarador gaz turbinalari quriladi. Bu haqda “Issiqlik elektr stansiyalari” xabar berdi.
Shartnoma Germaniya-O‘zbekiston biznes forumi doirasida “Issiqlik elektr stansiyalari” va “Siemens Energy” kompaniyasi o‘rtasida imzolandi.
© Foto : AO "Teplovie elektricheskie stansii"
“Mazkur loyiha doirasida 72 mln yevro miqdorida shartnoma tuzildi. Unda har birining quvvati 54 MVtga teng bo‘lgan ikkitadan, jami 4 ta gaz turbina o‘rnatiladi”, - deyiladi xabarda.
Buxoro va Muborak shaharlarida ushbu qurilmalarning ishga tushirilishi mamlakatda ishlab chiqariladigan elektr energiyasining umumiy quvvatini 216 MVtga oshiradi.
Dastlabki hisob-kitoblarga ko‘ra, bu yiliga 1,7 mln kVt.soat elektr energiyasi va 1,5 mln Gkal issiqlik energiyasini ishlab chiqarish imkonini beradi. Shuningdek, 80 ta yangi ishchi o‘rinlari yaratiladi.