TOShKENT, 30 apr — Sputnik. Rossiyaga qarshi sanksiya kiritgan G‘arb mamlakatlari o‘z fuqarolari manfaatlari xususida o‘ylab ko‘rishlari lozim. Bu haqda Rossiya Davlat dumasi raisi Vacheslav Volodin “Rossiya-1” telekanaliga bergan intervyusida ma’lum qildi.
Rossiya parlamenti quyi palatasi spikerining so‘zlariga ko‘ra, Yevropa fuqarolari “Vashington va Brussel qarorlarining barcha og‘irliklarini his qilishapti”.
“Bu vaqt mobaynida qator hukumatlar iste’foga chiqib bo‘ldi. Amerika Qo‘shma Shtatlari haqida gapiradigan bo‘lsak, u yerda inqiroz o‘zining eng yuqori cho‘qqisiga chiqmoqda. Bu vaziyatda ular kallalarini ishlatishlari, mas’uliyatni tushunib, avvalo o‘z fuqarolari manfaatlari haqida o‘ylashlari kerak”, - dedi Volodin.
Eslatib o‘tamiz, Ukrainada maxsus operatsiya boshlanganidan so‘ng AQSh boshchiligida G‘arb davlatlari Moskvaga nisbatan sanksiyalar bosimini keskin kuchaytirdi. Rossiya eksporti sohasi, bank va boshqa sohalariga nisbatan keskin sanksiyalar joriy etildi. Lekin o‘tgan vaqt davomida ular ketilgan natijaga olib kelmadi, rubl qulamadi, Rossiya iqtisodiyoti barbod bo‘lmadi. Yevropa va AQShda esa sanksiyalar oqibatida elektr energiyasi, yoqilg‘i va oziq-ovqat narxlari oshdi.
Rossiya prezidenti Vladimir Putin Rossiyani jilovlash va zaiflashtirish siyosati G‘arbning uzoq muddatli strategiyasi ekanligini va cheklovlar butun dunyo iqtisodiyotiga jiddiy zarba berganini aytdi. Rossiya rahbarining so‘zlariga ko‘ra, AQSh va uning ittifoqchilarining asosiy maqsadi - dunyoda millionlab odamlar hayotini yomonlashtirishdir.