TOShKENT, 26 apr — Sputnik. Toshkent shahar hokimi v.b. Shavkat Umurzoqov Sankt-Peterburg shahri vitse gubernatori Kirill Polyakov boshchiligidagi delegatsiya bilan uchrashdi. Bu haqda poytaxt hokimligi matbuot xizmati xabar berdi.
© Press-slujba xokimiyata Tashkenta
Umurzoqov ikki davlat o‘rtasidagi strategik sheriklik va keng ko‘lamli hamkorlik hududlar miqyosida ham samarali olib borilayotganligini ta’kidladi.
Umurzoqov Toshkent shahrining Sankt-Peterburg bilan aloqalari serqirra ekanligiga to‘xtalib, savdo-sotiq, sanoat, ta’lim, madaniyat, turizm, qurilish, zamonaviy texnologiyalar sohasidagi hamkorlik qatori qo‘shma investitsion loyihalarni amalga oshirish, ikki tomon tadbirkorlari o‘rtasida munosabatlarni mustahkamlash, o‘zaro samarali bo‘lgan iqtisodiy yo‘nalishlarni rivojlantirish muhimligiga e’tibor qaratdi.
Sankt-Peterburg Tashqi aloqalar bo‘yicha qo‘mitasi raisi Yevgeniy Grigoryev bu uchrashuv Toshkentda yirik va nufuzli xalqaro tadbir – “INNOPROM. Markaziy Osiyo” xalqaro ko‘rgazmasi o‘tkazilayotgan kunlarda bo‘lib o‘tayotgani ham ahamiyatli ekanligini qayd etdi. O‘zbek xalqining ikkinchi jahon urushi yillarida ko‘rsatgan mardligi, jasorati, bag‘rikengligi uchun piterliklar O‘zbekistonni alohida qadrlashini bildirdi.
U turli sohalarda o‘zaro aloqalarni kengaytirish va taraqqiy ettirishda Toshkent shahri delegatsiyasining Sankt-Peterburgga tashrifi ahamiyatli bo‘lishini ta’kidlab, hokimlik delegatsiyasini Peterburgga taklif etdi.
Sankt-Peterburg shahri vitse gubernatori Kirill Polyakov yo‘l-transport sohasida amalga oshirilgan ishlar, xususan, aholini sifatli transport xizmati bilan ta’minlash, tirbandliklarning oldini olish, sohaga innovatsion texnologiyalarni joriy etish samaralari haqida ma’lumot berdi.
© Press-slujba xokimiyata Tashkenta
Uchrashuvda qurilish va kommunal xo‘jalikda qo‘llanilayotgan yangi texnika va texnologiyalar borasida ham fikr almashildi.
Tomonlar amaliy muloqotlar davom etishini bildirishdi.
© Press-slujba xokimiyata Tashkenta