TOShKENT, 25 apr — Sputnik. O‘zbekistonda ta’limni rivojlantirish respublika ilmiy-metodik markazi tashkil etilmoqda. Bu prezident 20-aprel kuni imzolagan “Ilmiy-metodik va tadqiqot ishlari sifatini oshirish orqali ta’lim tizimini kompleks rivojlantirishni jadallashtirish bo‘yicha chora-tadbirlar to‘g‘risida”gi qarorda belgilangan.
Ta’limni rivojlantirish respublika ilmiy-metodik markazi (Respublika markazi) davlat muassasasi shaklidagi yuridik shaxs hisoblanadi.
Respublika markazi, jumladan:
ta’lim standartlari, o‘quv rejalari va dasturlariga qo‘yiladigan talablarni ishlab chiqadi va tasdiqlaydi;
maktabgacha, umumiy o‘rta va maktabdan tashqari ta’lim tashkilotlari uchun yangi darsliklar va o‘quv-metodik majmualarni nashr qilish, tajriba-sinovdan o‘tkazish va ekspertiza qilishni tashkillashtiradi.
Respublika markazi faoliyatiga umumiy rahbarlik prezidentning fan, ta’lim, sog‘liqni saqlash va madaniyat masalalari bo‘yicha maslahatchisi bo‘linmalari tomonidan amalga oshiriladi.
Respublika markaziga prezident tayinlaydigan direktor rahbarlik qiladi.
Respublika markazi tomonidan ishlab chiqilgan va tasdiqlangan ta’lim standartlari, o‘quv rejalari va dasturlariga qo‘yiladigan talablar maktabgacha, umumiy o‘rta va maktabdan tashqari ta’lim tashkilotlari, shuningdek, o‘quv kurslari uchun majburiy hisoblanadi.
Qarorga ko‘ra, vakolatli davlat organlari maktabgacha, umumiy o‘rta va maktabdan tashqari ta’lim tashkilotlari, shuningdek, o‘quv kurslarini litsenziyalash, attestatsiya va davlat akkreditatsiyasidan o‘tkazishni Respublika markazi bilan kelishgan holda amalga oshiradi.