TOShKENT, 22 apr — Sputnik. Surxondaryoda tadbirkor 40 ta ehtiyojmand oilaga uy hadya qildi. U nomini ochiqlamaslikni so‘radi, deya xabar berdi O‘zA.
Sherobod tumanida ehtiyojmand xotin-qizlar, kam ta’minlangan va nogironligi bor oilalar uchun 40 xonadonga mo‘ljallangan ikkita besh qavatli uy foydalanishga topshirildi.
“Ota-onamdan erta ajralib, momom va amakilarim qo‘lida kamolga yetdim. Yolg‘iz farzandman. Talaba bo‘lganim uchun talabalar yotoqxonasida yashayotgan edim. Shunday keng, yorug‘ uyga bepul egalik qilishni tasavvur ham qilolmas edim. Ramazon hayiti kuni yangi uyli bo‘lganimdan quvonchim cheksiz”, deydi Kamola Hasanova.
Ikkita ko‘p qavatli uydagi xonadonlar ikki va uch xonali bo‘lib, yangi uy egalari kirib yashashlari uchun barcha sharoit yaratilgan.
Mazkur uylarni fuqarolarga hadya qilgan tadbirkor o‘tgan yili ham tumandagi 27 ta kam ta’minlangan uy-joyga muhtoj oilaga kottej uy qurib, hadya qilgan.