TOShKENT, 16 apr — Sputnik. O‘zbekiston xalq artisti, balerina Guli Xamrayeva 76 yoshda vafot etdi. Bu haqda Madaniyat va turizm vazirligi ma’lum qildi.
Guli Xamrayeva Alisher Navoiy nomidagi O‘zbekiston davlat akademik katta teatrining prima balerinasi, eng sara jahon va milliy klassik balet spektakllaridagi yetakchi partiyalar ijrochisi bo‘lgan.
Uning “Baxchirayskiy fontan”, “Don Kixot”, “Esmeralda”, “Dilorom”, “Amulet lyubvi”, “Spartak” va boshqa ko‘plab spektakllardagi yetakchi partiyalari milliy balet xazinasidan munosib o‘rin egallagan.
Guli Xamrayeva 1946-yil 2-dekabrda Toshkentda tug‘ilgan. U 1966-yilda Toshkent xoreografiya bilim yurtini tamomlagan. Shu yili Alisher Navoiy nomidagi Katta opera va balet teatrining balet truppasiga qabul qilingan. U 2002-yildan Toshkent davlat milliy raqs va xoreografiya oliy maktabining rektori lavozimida ishlagan.