SAMARQAND, 14 apr — Sputnik. O‘zbekiston va Rossiya doimo birga bo‘lgan va ishonchli ittifoqchi hamda strategik sherik bo‘lib qoladi. Bu haqda O‘zbekiston tashqi ishlar v.b. Baxtiyor Saidov Samarqandda bo‘lib o‘tayotgan tashqi ishlar vazirlarining “MO5+Rossiya” formatidagi 6-uchrashuvida ma’lum qildi, deya xabar berdi Sputnik muxbiri.
Samarqandda tashqi ishlar vazirlarining “MO5+Rossiya” formatidagi 6-uchrashuvi bo‘lib o‘tmoqda. Unda Saidov O‘zbekiston va Rossiya o‘rtasidagi hamkorlik munosabatlariga to‘xtalib o‘tdi.
“O‘zbekiston va Rossiya doimo birga bo‘lgan va ishonchli ittifoqchi va strategik sherik bo‘lib qoladi. O‘zbekiston-Rossiya o‘rtasidagi ko‘p qirrali hamkorlik keyingi yillarda misli ko‘rilmagan yuksak darajaga ko‘tarildi”, - deydi u.
Uning so‘zlariga ko‘ra, ko‘p sonli tahdid va maxfiy chaqiriqlarning kuchayishi sharoitida Markaziy Osiyo davlatlari va Rossiya o‘rtasidagi o‘zaro anglashuv muloqoti alohida ahamiyatga ega.
“Rossiya mintaqamiz mamlakatlari uchun eng yaqin do‘st, hamkor va ittifoqchi hisoblanadi. O‘tgan davr mobaynida siyosiy, savdo-iqtisodiy, sarmoyaviy, madaniy-gumanitar va boshqa sohalardagi hamkorlikni sezilarli darajada kengaytirishga erishdik”, - deya qo‘shimcha qildi vazir.
Samarqandda 14-aprel kuni Rossiya va Markaziy Osiyo davlatlari tashqi ishlar vazirlarining oltinchi uchrashuvi bo‘lib o‘tmoqda. Yig‘ilishda Rossiya, O‘zbekiston, Qozog‘iston, Qirg‘iziston, Tojikiston va Turkmaniston tashqi ishlar vazirliklari vakillari ishtirok etmoqda.
Uchrashuvda ishtirokchilar siyosiy, diplomatik, savdo-iqtisodiy, transport, energetika, madaniy-gumanitar sohalardagi olti tomonlama hamkorlikning istiqbolli yo‘nalishlarini muhokama qiladilar.