TOShKENT, 19 mar — Sputnik. Qirg‘iziston Xavfsizlik kengashi kotibi Marat Imonqulov o‘zbekistonlik hamkasbi Viktor Mahmudov bilan maslahatlashuvlarning ikkinchi raundini o‘tkazdi. Bu haqda Sputnik Qirg‘iziston Qirg‘iziston rahbari ma’muriyatiga tayanib xabar bergan.
Uchrashuv Toshkentda bo‘lib o‘tdi. Birinchi bosqich 2019-yilda Bishkekda o‘tkazilgan.
Xavfsizlik kengashi kotiblari mintaqaviy xavfsizlikni ta’minlash, terrorizm, ekstremizm, narkotik moddalarning noqonuniy aylanishi va transmilliy uyushgan jinoyatchilikning boshqa shakllariga qarshi kurashish sohasidagi chora-tadbirlarni muhokama qildi.
Shuningdek, harbiy va harbiy-texnikaviy sohalardagi hamkorlikning istiqbolli yo‘nalishlari, chegara hududlarida tabiiy va texnogen xususiyatli favqulodda vaziyatlarning oldini olish va ularni tezkor bartaraf etish sohasida o‘zaro hamkorlik haqida so‘z yuritildi.
Imonqulov mazkur tadbir davlat rahbarlarining tinchliksevar siyosatining mantiqiy davomi bo‘lib, Qirg‘iziston va O‘zbekiston xalqlari farovonligi yo‘lida davlatlararo hamkorlik va ishonchni mustahkamlash bo‘yicha doimiy maqsadlarga ega ekanini ta’kidladi.
Uchrashuv yakunlari bo‘yicha ikki davlat vakillari xavfsizlik, tezkor ma’lumotlar almashinuvi, treninglar va mashg‘ulotlar o‘tkazish bo‘yicha hamkorlikni kengaytirishga oid qo‘shimcha ikki tomonlama chora-tadbirlarni belgilab beruvchi bayonnomani imzoladi, shuningdek, ortib borayotgan tahdid va muammolarga qarshi kurashish bo‘yicha ko‘p tomonlama sa’y-harakatlar muhimligini ta’kidladi.