TOShKENT, 15 mar — Sputnik. O‘zbekiston va Qirg‘iziston aprel oyida qo‘shma avtomobil zavodi qurilishini boshlaydi. Bu haqda Sputnik O‘zbekiston muxbiriga Qirg‘iziston iqtisodiyot va savdo vaziri o‘rinbosari Aynura Usenbekova ma’lum qildi.
“Aprel oyidan boshlab avtomobil zavodi qurishni rejalashtirmoqdamiz. Iyulgacha zavodni ishga tushirishimiz kerak”, - dedi u.
Zavod Chuy viloyatida quriladi. Yil oxirigacha 600 dona avtomobil ishlab chiqarish rejalashtirilgan. Loyiha bir necha bosqichda amalga oshiriladi.
“Birinchi bosqichda 3-yil ichida 10 ming dona, ikkinchi bosqichda 20 ming va uchinchi bosqichda 30 ming dona avtomobil ishlab chiqarish rejalashtirilgan”, - dedi u.
Usenbekova, shuningdek, 19 ta model ishlab chiqarish tasdiqlanganini va birinchi chiqariladigan marka Cobalt bo‘lishini ta’kidladi.
O‘zbekiston prezidenti Shavkat Mirziyoyevning Bishkekka davlat tashrifi doirasida avtomobil va tijorat texnikalarini ishlab chiqarishni tashkil etish bo‘yicha hamkorlik to‘g‘risidagi bitim imzolangandi.
O‘zbekiston tomonidan loyiha ustida "O‘zavtosanoat", Qirg‘iziston tomonidan “DT Texnik” MChJ va “Nur” OAJ ishlaydi.