TOShKENT, 14 mar — Sputnik. O‘zbekiston prezidenti "Toshkent shahridagi iste’molchilarni energiya resurslari bilan barqaror ta’minlash chora-tadbirlari to‘g‘risida"gi qarorini imzoladi.
Toshkent shahrining qo‘shimcha elektr energiyasiga bo‘lgan ehtiyojini qoplash uchun:
“ACWA Power” (Saudiya Arabistoni) kompaniyasi ishtirokida Toshkent viloyati Yuqori Chirchiq tumanidagi “O‘zsuvta’minot” AJ hududida quvvati 400 MVt bo‘lgan quyosh fotoelektr stansiyasini qurish loyihasining birinchi bosqichi quvvatlarini (100 MVt);
“China Gezhouba Group Investment Company Co. LTD” (Xitoy) kompaniyasi ishtirokida Toshkent viloyati Yuqori Chirchiq tumanida quvvati 700 MVt bo‘lgan quyosh fotoelektr stansiyasini qurish loyihasining birinchi bosqichi quvvatlarini (100 MVt) joriy yil yakuniga qadar ishga tushirish nazarda tutilmoqda.
2023 yilda Toshkent shahri elektr ta’minotini yaxshilashga qaratilgan 35-110 kV kuchlanishli elektr tarmoqlarini rivojlantirish loyihasi tasdiqlandi.
U quyidagilarni nazarda tutadi: loyihani amalga oshirish uchun "Hududiy elektr tarmoqlari" AJga jami 3,5 trillion so‘m miqdoridagi mablag‘lar korxonalarning o‘z mablag‘lari va tovar kreditlari hisobidan yo‘naltiriladi.
Shuningdek, hujjat bilan quyidagilar tasdiqlandi:
- 2023-2025 yillarda Toshkent shahrining past kuchlanishli elektr tarmoqlarini yangilash dasturining maqsadli ko‘rsatkichlari;
- 2023-yilda Toshkent shahri tumanlarining past kuchlanishli elektr tarmoqlarini yangilash dasturining manzilli ro‘yxatlari.
Dastur doirasida loyihalashtirish, qurilish-montaj ishlarini bajarish, uskunalar va jihozlarni xarid qilish va o‘rnatish ishlari “fast track” usulida amalga oshiriladi. Bunda qurilish-montaj ishlari uchun texnik-iqtisodiy asoslar ishlab chiqilmaydi.