TOShKENT, 4 mar — Sputnik. Dzudo bo‘yicha Toshkent “Katta dubulg‘a” turnirida O‘zbekiston terma jamoasi ilk oltin medalini qo‘lga kiritdi. Bu haqda Milliy olipiya qo‘mitasi xabar berdi.
Poytaxtdagi Yunusobod sport majmuasida dzudo bo‘yicha Toshkent "Katta dubulg‘a" turniri bo‘lib o‘tmoqda.
Unda Murodjon Yo‘ldoshev O‘zbekiston terma jamoasi ilk oltin medalini qo‘lga kiritdi. U -73 kg vazn toifasida kurashib, barcha raqiblarini mag‘lub etdi va musobaqa g‘olibiga aylandi.
Yo‘ldoshev final bellashuvida qozog‘istonlik Doniyor Shamshayevga qarshi bellashdi. Bahs davomida har tomonlama ustunlik qilgan Yo‘ldoshev ajoyib g‘alabani tantana qildi.
Eslatib o‘tamiz, musobaqada dunyoning 60 ga yaqin mamlakatidan sportchilar ishtirok etmoqdi. Xalqaro dzudo federatsiyasi (IJF) taqvimidan o‘rin olgan ushbu turnirning mukofot jamg‘armasi 154 000 yevro etib belgilangan.
G‘olib va sovrindorlar xalqaro turnir medallari hamda Parij-2024 Olimpiadasi yo‘lidagi qimmatli reyting ochkolarini qo‘lga kiritadi. Turnir 5-martga qadar davom etadi.