TOShKENT, 25 fev — Sputnik. G‘arb Xitoyning Ukraina inqirozini hal qilish rejasini diqqat bilan o‘rganib chiqishi va mojaroni tinch yo‘l bilan hal qilishga to‘sqinlik qilishni bas qilishi kerak. Bu haqda RIA Novosti Global Times maqolasiga tayanib xabar berdi.
“Qo‘shma Shtatlar va G‘arbda kimdir nizolashayotgan tomonlarning muzokaralar stoliga qaytishini istamayapti, aksincha ular suvni yanada loyqalashtirib, o‘z manfaatlarini ko‘zlamoqchi”, - deyiladi materialda.
Xitoy gazetasi muharrirlariga ko‘ra, aynan AQSh va NATO Ukrainadagi mojaroning tashabbuskori bo‘lgan va jang maydoniga og‘ir qurollar yetkazib berishda davom etmoqda. Shuningdek, tinch yo‘l bilan hal qilishga to‘sqinlik qiluvchi barcha turdagi hodisalarni keltirib chiqarmoqda.
Nashr misol tariqasida “Shimoliy oqim”dagi portlashlarni keltirgan.
“Biz AQSh va G‘arb siyosiy elitalari Xitoyning 12 banddan iborat pozitsiyasini sinchkovlik bilan o‘rganishi zarur, deb hisoblaymiz. U Ukrainadagi hozirgi mojaroga e’tibor qaratgan bo‘lsa-da, dunyoning boshqa qismlaridagi mojarolar va notinchliklar haqidagi fikrlarni aks ettiradi, ularning aksariyati AQSh va G‘arb tashqi siyosati bilan chambarchas bog‘liq”, deyilgan maqolada.
Avvalroq Xitoy TIV Ukrainadagi inqirozni siyosiy yo‘l bilan hal qilish bo‘yicha 12 banddan iborat rejani taqdim etgandi.