TOShKENT, 16 fev - Sputnik. Ob-havo sharoiti tufayli Farg‘ona aeroportida samolyotlarni qabul qilish va jo‘natish vaqtincha cheklandi, deb xabar qildi Uzbekistan Airports.
"Farg‘ona xalqaro aeroportida ko‘rish imkoniyati yomonlashgani tufayli — masofa 600 metr, havo kemalarini qabul qilish va jo‘natishga cheklovlar joriy etildi", - deyiladi kompaniya rasmiy telegram kanalida.
Eslatib o‘tamiz, 15-fevral kuni ob-havo sharoiti noqulay bo‘lgani sababli El-Quvaytdan O‘shga uchgan Jazeera Airways kompaniyasi samolyoti Toshkentga qo‘nishga majbur bo‘lgan edi.
Shuningdek, Flydubai kompaniyasining Dubaydan Dushanbega uchgan samolyoti ham 15-fevral kuni qalin tuman tufayli Samarqandga qo‘nishga majbur bo‘lgan edi.