TOShKENT, 6 fev — Sputnik. O‘zbekiston kuchli zilziladan jabr ko‘rgan Turkiyaga yordam beradi. Bu haqda O‘zbekiston rahbari matbuot kotibi ma’lum qildi.
“Prezident Shavkat Mirziyoyevning topshirig‘iga muvofiq, Turkiyada ro‘y bergan kuchli zilziladan jabr ko‘rganlarga gumanitar yordam hamda tabiiy ofat oqibatlarini bartaraf etishda ishtirok etish uchun Favqulodda vaziyatlar vazirligining bir guruh qutqaruvchilari jo‘natiladi”, - deyiladi xabarda.
6 fevral kuni Turkiyaning janubi-sharqiy qismidagi viloyatlarda kuchli yuz berdi. Uning kuchi 7,7 ballgacha baholangan. So‘nggi ma’lumotlarga ko‘ra, zilzila oqibatida halok bo‘lganlar soni 912 nafarga yetgan, 5385 kishi esa turli darajada jarohat olgan. Turkiya prezidenti Rejep Tayyip Erdog‘an zilzilani so‘nggi 80-yil ichidagi eng kuchli ekanini ma’lum qildi.
Avvalroq Shavkat Mirziyoyev kuchli zilzila oqibatida ko‘plab odam qurbon bo‘lgani munosabati bilan turkiyalik hamkasbi Rejep Tayyip Erdog‘anga hamdardlik yo‘llagan edi.
6 fevral Toshkent vaqti bilan soat 11:00 holatiga ko‘ra, O‘zbekistonning Turkiyadagi diplomatik vakolatxonalariga zilzila oqibatida halok bo‘lgan va jarohatlangan mamlakat fuqarolari bo‘yicha ma’lumot kelib tushmagan.