TOShKENT, 1 fev — Sputnik. Ukraina mag‘lubiyatga yaqin turibdi, jiddiy demografik muammolar esa davlatning kelajakda mavjudligini shubha ostiga qo‘yadi. Bu haqda Pentagon rahbarining sobiq maslahatchisi, AQSh armiyasining iste’fodagi polkovnigi Duglas Makgregor ta’kidladi.
“Amerikada hozir hamma Ukraina yutqazayotganini biladi. Ukraina qarshiliklari qulayapti. Mamlakatning o‘zi ham yo‘q bo‘lib ketish xavfi ostida - barchasi juda yomon”, - deydi u.
Polkovnikning ta’kidlashicha, aholining chiqib ketishi bilan bog‘liq jiddiy demografik inqiroz Kiyev uchun asosiy muammoga aylanib bormoqda. Aytilishicha, mojaro boshlanganidan beri aholining taxminan chorak qismi mamlakatni tark etgan.
“G‘arbda hech kim bizga dahshatli yo‘qotishlar haqida haqiqatni aytmaydi. Bugungi kunda Ukrainada Zelenskiy nazorati ostida taxminan 18-22 million kishi bor. Bu raqam taxminan Niderlandiya aholisi soniga teng”, - dedi harbiy.
Birlashgan Millatlar Tashkilotining Qochqinlar bo‘yicha oliy komissarligi boshqarmasi ma’lumotlariga ko‘ra, 9-avgustda 10,5 milliondan ortiq odam qo‘shni davlatlarga kirish uchun Ukraina chegaralarini kesib o‘tgan. Hisobotga ko‘ra, Rossiya dunyodagi eng ko‘p qochqinlarni qabul qilgan: 1 968 127 kishi.
Rossiya 2022-yil 24-fevralidan beri Ukrainada maxsus harbiy operatsiya o‘tkazmoqda. Rossiya prezidenti Vladimir Putin uning vazifasini “sakkiz yil davomida Kiyev rejimi tomonidan tahqirlangan va genotsidga uchragan odamlarni himoya qilish” deb atagan. Putinning so‘zlariga ko‘ra, operatsiyadan asosiy maqsad Donbassni ozod qilish va Rossiyaning o‘zi xavfsizligini kafolatlaydigan shart-sharoitlarni yaratishdir.