TOShKENT, 19 yanv — Sputnik. O‘zbekistonda kartoshkaning yangi ultra ertapishar “Toshkent ertagisi” navini yaratildi. Bu haqda Qishloq xo‘jaligi vazirligi xabar berdi.
Uni Sabzavot, poliz ekinlari va kartoshkachilik ilmiy-tadqiqot institutining seleksioner olimlari yaratishgan.
Yangi kartoshka navi mavjud navlardan bir nechta ustunlik jihatlari bilan ajralib turadi. Jumladan, u ultra ertapishar nav, mavjud mahalliy ertapishar navlardan 10-12 kun vaqtli yetiladi.
Qayd etilishicha, bu yil barcha toifa xo‘jaliklarda 286 ming gektarga, kartoshka ekish rejalashtirilgan. Tuproq-iqlim sharoitlarini inobatga olib, respublikaning 40 ta kartoshka yetishtirishga ixtisoslashtirilgan tumanlarida 71 ming gektar maydonda kartoshka yetishtiriladi.
Ma’lumot uchun, respublikada Davlat reyestriga kartoshkaning 152 taga yaqin navlari kiritilgan. Shundan 19 ta nav mahalliy ilmiy-tadqiqot institutlari olimlari tomonidan yaratilgan. Ko‘p yillik tadqiqotlar natijasida kartoshkaning yangi 11 ta mahalliy navlari ixtiro qilingan.
O‘tgan yili respublikadagi barcha toifa xo‘jaliklarda 221,5 ming gektarga kartoshka ekilgan edi. Mazkur maydonlardan 3,4 mln tonna kartoshka yetishtirildi.
Tibbiy meyorlar nuqtayi nazaridan, aholining kartoshkaga bo‘lgan 1-yillik ehtiyoji (1 kishiga 96 kg) 3,4 mln tonnani tashkil etadi.
Eslatib o‘tamiz, o‘tgan yilning yanvar-noyabr oylarida O‘zbekiston 16 ta davlatdan qiymati 73,4 million dollarga teng bo‘lgan 478,3 ming tonna kartoshka import qilgan. Kartoshka importi o‘tgan yilning mos davri bilan solishtirilganda 22,5 ming tonnaga oshgan.
O‘zbekiston 11 oy davomida Pokistondan 259,1 ming tonna, Qozog‘istondan 155,1 ming tonna, Qirg‘izistondan 30 ming tonna, Rossiyadan esa 15 ming tonna kartoshka import qilgan.