TOShKENT, 14 yanv — Sputnik. Oliy Majlis Senati a’zosi, O‘zbekiston xalq shoiri Enaxon Siddiqova 68 yoshida vafot etdi. Bu haqda O‘zA xabar berdi.
Enaxon Siddiqova 1954-yil 28-avgustda Farg‘ona viloyati Oltiariq tumanida tavallud topgan.
U 1976-yil Farg‘ona davlat institutining filologiya fakultetini tamomlagan. Oltiariq va Farg‘ona tumanlari maktablarida o‘qituvchi, maktab direktori vazifalarida ishlagan. "Farg‘ona haqiqati", "Ferganskaya pravda" gazetasi, Farg‘ona viloyati hokimi o‘rinbosari kotibiyatida faoliyat olib borgan.
Enaxon Siddiqovaning "Qorako‘z turnalar", "Sumanbar nasim", "Ko‘ngil ufqlari", "Ishq ifori" kabi she’riy to‘plamlari, "Sirli tun farodi" hikoyalar majmuasi, "Qizoyimlarga kelinlik saboqlari", "Tibbiyot fidoyilari", "Xaloskorlik", "E’zozli ayollar" kabi publitsistik asarlari nashr etilgan.
Enaxon Siddiqova "Do‘stlik", "El-yurt hurmati" ordenlari bilan mukofotlangan.