TOShKENT, 12 yanv — Sputnik. Sog‘liqni saqlash vaziri Amrillo Inoyatovning shaxsiy telefon raqami orqali korrupsion holatlar yuzasidan murojaatlar qabul qilish boshlandi. Bu haqda vazirlik matbuot xizmati xabar berdi.
Qayd etilishicha, Sog‘liqni saqlash vazirining (+998-91) 403-17-73 shaxsiy telefon raqami orqali sohadagi korrupsiyaviy holatlar yuzasidan aniq fakt va dalillarga asoslangan murojaatlar qabul qilinadi.
Bundan tashqari, murojaatlar quyidagi platformalar orqali ham qabul qilinadi:
vazirlik qoshida 24 soat faoliyat olib boruvchi "1003" qisqa raqamli “Sall-markaz”;
Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalari qoshida muntazam faoliyat yurituvchi "1103" qisqa raqamli “Sall-markaz”lar;
vazirlikning yangi ishga tushirilgan rasmiy telegram-boti;
barcha tuman tibbiyot muassasalarining fuqarolar gavjum bo‘ladigan joylariga o‘rnatilgan va tibbiyot maskani rahbari bilan bog‘lanish imkonini beruvchi “to‘g‘ridan-to‘g‘ri aloqa” liniyalari;
vazirlik rasmiy veb-saytida aholidan kelib tushayotgan savollarga tezkor javob berishga mo‘ljallangan “Jivo” ilovasi.
Ma’lumot uchun, sog‘liqni saqlash vaziri Amrillo Inoyatov 2023-yil tizimda “Korrupsiyaga qarshi kurash yili” deb e’lon qilgan.