TOShKENT, 10 yanv — Sputnik. Rossiya harbiylari Soledarni ozod qilishga yaqin turibdi. Bu haqda DXR rahbari vazifasini bajaruvchi Denis Pushilin ma’lum qildi.
“Haqiqatan ham, hozir barcha e’tibor Artomovskka ham, Soledarga ham qaratilmoqda, Soledarda voqealar shu tarzda rivojlanmoqdaki, shahar ozod qilinishga juda yaqin”, - dedi u.
Pushilinning so‘zlariga ko‘ra, hozir janglar Soledarning g‘arbiy qismiga o‘tgan.
“Aslida, bu dushman hali ham orqaga chekinishi, o‘z bo‘linmalarining qoldiqlarini saqlab qolishi mumkin bo‘lgan yagona yo‘nalish”, - deb tushuntirdi u.
Ta’kidlanishicha, Ukraina Qurolli kuchlari garnizoni yo‘qotishlaridan qat’iy nazar qarshilik ko‘rsatishda davom etmoqda.
“Soledarning ozod etilishi ittifoqchi kuchlarning yanada oldinga siljishiga yordam beradi”, - deya qo‘shimcha qildi Pushilin.
Uning aytishicha, shaharning ozod etilishi ittifoqchi kuchlarning Kramatorsk yo‘nalishidagi hujumi istiqbollariga ijobiy ta’sir ko‘rsatadi.
Shu bilan birga, DXR rahbari vazifasini bajaruvchi maslahatchisi Yan Gagin Artomovsk ham “ozodlikka yaqin” ekanini qo‘shimcha qildi.
“Keyingi soatlarda bo‘lmasa ham, keyingi kunlarda Artomovsk haqiqatan ham ozod qilinganini bilib olamiz”, - deydi Gagin.
Ma’lumot o‘rnida, har ikki shahar uchun shiddatli janglar davom etmoqda.
Kecha LXR xalq militsiyasining rasmiy vakili Ivan Filiponenko Ukraina Qurolli kuchlari harbiylarining Soledardan ommaviy chiqib ketayotganini ma’lum qilgandi.
24 fevraldan beri Rossiya Ukrainada maxsus harbiy operatsiya o‘tkazmoqda. Rossiya prezidenti Vladimir Putin uning maqsadini “sakkiz yil davomida Kiyev rejimi tomonidan tahqirlangan va genotsidga uchragan odamlarni himoya qilish” deb atagan. Qurolli kuchlar oldida Donbassni ozod qilish va Rossiya xavfsizligini kafolatlash vazifasi turibdi.