TOShKENT, 6 yanv — Sputnik. Noqulay ob-havo sharoiti Namangan va Andijon aeroportlari faoliyatini cheklab qo‘ydi. Bu haqda Uzbekistan airports xabar berdi.
Namangan va Andijon xalqaro aeroportlarida quyuq sovuq tuman tufayli ko‘rishning yomonlashishi havo kemalarini qabul qilish va jo‘natishni vaqtincha to‘xtatilishiga olib keldi.
Xususan, Namanganda ko‘rinish chegarasining 700 metrgacha pasayib ketishi sababli “Uzbekistan Airways” aviakompaniyasining HY9816/9821 (Orenburg — Namangan — Irkutsk) va HY9822/94 (Irkutsk — Namangan — Toshkent) yo‘nalishlari bo‘yicha reyslari o‘zgartirildi.
Air Arabia aviakompaniyasining G9784/785 (Sharja — Namangan — Sharja), shuningdek, Red Wings aviakompaniyasining WZ4483/4484 (Moskva — Namangan — Moskva) reysi Toshkent xalqaro aeroportidan amalga oshiriladi.
Noqulay ob-havo sharoiti (ko‘rish masofasi 900 metr) Andijon aeroporti ishining cheklanishiga ham sabab bo‘ldi. “Uzbekistan Airways”ning HY091 (Toshkent — Farg‘ona), HY049 (Farg‘ona — Samarqand), HY050 (Samarqand — Farg‘ona) va HY092 (Farg‘ona — Toshkent) reyslari o‘zgartirilgan yo‘nalish bo‘yicha amalga oshiriladi.
Ma’lumot uchun, noqulay ob-havo tufayli Namangan va Andijon aeroportlari vaqti-vaqti bilan o‘z ishini to‘xtatib, qayta tiklashga majbur bo‘lmoqda. Parvozlar jadvalidagi o‘zgarishlar to‘g‘risidagi batafsil ma’lumotlarni aviatashuvchilardan olish mumkin.