TOShKENT, 4 yanv - Sputnik. O‘zbekistonda 2022-yil davomida yer mulki sohasida eng ko‘p uchraydigan qoidabuzarliklar haqida Kadastr agentligi AOKAda ma’lum qildi.
Yer uchastkasini o‘zboshimchalik bilan egallash
O‘zbekeistonda o‘tgan 2022-yil davomida 18 597 ta (6307ga) yer uchastkalarini o‘zboshimchalik bilan eggallash holatlari aniqlangan.
Shundan 9 927 tasi (4 957,8 ga) fuqarolar tomonidan ixtiyoriy ravishda bartaraf etilgan. 8138 ta (1185,3 ga) holatda sudlarga da’vo arizalari kiritildi va 4583 ta (635,0 ga) holatda sudning hal qiluv qarori qabul qilindi. Boshqa holatlar bo‘yicha sud jarayoni davom etmoqda.
Yerdan maqsadsiz foydalanish
Yerlardan maqsadsiz foydalanish holatlarini o‘z vaqtida aniqlash va chora ko‘rilishini ta’minlash bo‘yicha:
O‘zbekiston bo‘yicha 2022-yilda 2 135 ta (15 130,4 ga) holatda yerlardan maqsadsiz foydalanish holatlari aniqlangan.
Shundan 1919 ta (14 099,7 ga) holatda hokimliklarga taqdimnomalar kiritilgan va atigi 179 ta holatda (3 716,6 ga) yer maydonlarining tuman hokimliklari zaxirasiga qaytarilishi ta’minlangan, 216 ta holatda (1030,7ga) sudlarga da’vo arizasi kiritilgan.
Shuningdek, yer va kadastr nazoratini avtomatlashtirish, korrupsiya holatlarini oldini olish maqsadida yerga oid huquqbuzarliklarni aniqlashdan bartaraf etilgunga qadar monitoringini yurituvchi “E-YER NAZORAT” avtomatlashtirilgan axborot tizimi amaliyotga joriy etilgan.
Undan tashqari o‘tgan yil davomida mulkka bo‘lgan huquqini davlat ro‘yxatidan o‘tkazish uchun o‘z vaqtida vakolatga organga murojaat etmaslik holati bo‘yicha jami 23 292 ta holat aniqlanib, ularga nisbatan tegishli choralar ko‘rildi.